Mkoa una jumla ya wafanyabiashara zaidi ya 7,000 wa jumla na rejareja. Biashara zinazohusika ni kama vifaa vya ujenzi, madawa ya binadamu na mifugo, mafuta aina ya petroli, mafuta ya kula, masonara, wauza nguo mpya na mitumba, wauza nafaka, matunda na kadhalika.

Suala la uwekezaji katika Mkoa wa Mwanza lilianza kupewa kipaumbele katika mkoa wetu kwenye mkutano wa uwekezaji (Investors Forum) uliofanyika hapa Jijini Mwanza tarehe 19 – 20/08/2004. Lengo kubwa la mkutano huu lilikuwa kuutangaza mkoa wetu kwa wawekezaji kuja kuwekeza katika sekta za kilimo, uvuvi, madini, utalii, viwanda na biashara ambazo zina fursa kubwa ya kupiga vita umaskini kutokana na utajiri mkubwa katika sekta hizi kwa kuwekeza katika sekta hizi. Kutokana na mkutano huo mkoa umeanza kupata wawekezaji wanaotaka kuwekeza katika sekta hizo. Kutokana na dhima ya mkoa ya kuboresha uwekezaji na biashara katika mkoa, mkoa umekwishaunda Baraza la Biashara la Mkoa. Katika vikao vya Baraza hili suala la ardhi ya akiba (Land bank) kwa ajili ya uwekezaji limejitokeza kuwa tatizo kubwa na hivyo kuwa kikwazo cha uwekezaji. Kutokana na tatizo hilo, Baraza sasa linaandaa kikao ambacho kitakachokuwa na agenda moja tu ya kuzungumzia masuala ya ardhi kwa ujumla wake ili kupata ufumbuzi wa tatizo la ardhi kwa wawekezaji. Katika suala la ardhi mkoa unaamini yapo mambo ambayo yatakuwa ndani ya uwezo wa mkoa kuyatatua na yale ambayo yatakuwa nje ya uwezo wa mkoa yatapelekwa kwa mamlaka husika kupata ufumbuzi na ushauri.